ڈپٹی کمشنر قراۃ العین ملک کا رورل ہیلتھ سنٹر (آر ایچ سی) ڈھڈیال کا دورہ
ڈھڈیال (نامہ نگار ) ڈپٹی کمشنر قراۃ العین ملک کا سرکاری اداروں کی کارکردگی کو جانچنے کے لئے اچانک انسپکشن کا سلسلہ جاری ہے اور اس ضمن میں انہوں نے رورل ہیلتھ سنٹر (آر ایچ سی) ڈھڈیال کا دورہ کر کے عوام کو طبی سہولیات کی فراہمی کا جائزہ لیا ۔ ڈپٹی کمشنر نے مریضوں سے بھی طبی سہولیات کے بارے میں دریافت کیا ۔ انہوں نے آر ایچ سی انتظامیہ کو احکامات جاری کئے کہ مؤثر ہیلتھ کیئر مینجمنٹ کے ذریعے علاقہ کے عوام کو علاج معالجہ کی معیاری سہولیات فراہم کی جائیں ۔ ڈپٹی کمشنر نے ہیلتھ سینٹر میں صفائی، ادویات کے سٹاک اور دیگر انتظامی امور کا بھی جائزہ لیا اور آر ایچ سی انتظامیہ کو ہدایت کی کہ ہیلتھ کیئر سسٹم کی کارکردگی کا عمدہ معیار برقرار رکھتے ہوئے عوام کو بر وقت طبی سہولیات فراہم کی جائیں۔ قبل ازیں ڈپٹی کمشنر نے ہرڑ چوک سے پادشاہان روڈ کی بہتری و تعمیر نو کے سلسلہ میں اور میونسپل کمیٹی کے جاری تعمیراتی کام کا معائنہ کیا اور تعمیراتی شعبہ کی انتظامیہ کو ہدایت کی کہ روڈ کی بہتری پر مبنی تعمیر نو کے تمام تر عمل کی موقع پر نگرانی کی جائے تاکہ معیار و رفتار میں کمی نہ آنے پائے۔ اس موقع پر ڈپٹی ڈائریکٹر ڈویلپمنٹ فضل شیر بھی ڈپٹی کمشنر کے ہمراہ تھے ۔ انہوں نے کہا کہ تعمیر کا کام عمدہ معیار کے ساتھ دی گئی ٹائم لائن میں تیز رفتاری سے مکمل کیا جائے تاکہ عوام کو جلد از جلد آرام دہ سفر کی سہولت فراہم کی جاسکے۔
کوئی تبصرے نہیں